ନୂଆଦିଲ୍ଲୀ: ପାକିସ୍ତାନର ସବୁଠାରୁ ବଡ଼ ସହର କରାଚୀ ଏବେ ଭୟରେ ବଞ୍ଚୁଛି। ଲୋକମାନେ ରାତିରେ ଶୋଇପାରୁନାହାନ୍ତି। ପାକିସ୍ତାନରେ 'ପ୍ରଳୟ' ଆସିପାରେ ବୋଲି କହିଛନ୍ତି ସୋସିଆଲ ମିଡିଆରେ ଚର୍ଚ୍ଚା। କରାଚୀର ବାସିନ୍ଦା କୌଣସି ଆକ୍ରମଣକୁ ଭୟ ନୁହେଁ ବରଂ ସେମାନେ ଯେକୌଣସି ସମୟରେ ଆସୁଥିବା ଭୂମିକମ୍ପକୁ ନେଇ ଚିନ୍ତିତ। ପାକିସ୍ତାନ ପାଣିପାଗ ବିଭାଗ ଅନୁଯାୟୀ, ଗତ ୪୮ ଘଣ୍ଟା ମଧ୍ୟରେ ୨୧ଟି ମୃଦ୍ୟୁ ଭୂମିକମ୍ପ ହୋଇଛି। 

ବଡ଼ କଥା ହେଉଛି କିଛି ବିଶେଷଜ୍ଞ କହିଛନ୍ତି ଯେ ଏହି ଭୂମିକମ୍ପ ସିରିଜ୍ ପ୍ରତି ଶୁକ୍ରବାର ଏକ ବଡ଼ ଭୂମିକମ୍ପରେ ପରିଣତ ହୋଇପାରେ। ଏହାକୁ ନେଇ ଭୟଭୀତ କରାଚୀବାସୀ। ପିଏମଡି ମହାନିର୍ଦ୍ଦେଶକ ମେହେର ସାହିବଜାଦ ଖାନ କହିଛନ୍ତି, "ଆଗାମୀ ଦୁଇ ରୁ ତିନି ଦିନ ପର୍ଯ୍ୟନ୍ତ ମୃଦୁ ତୀବ୍ରତାର ଭୂମିକମ୍ପ ଜାରି ରହିବ ଏବଂ ଭୂମିକମ୍ପର ତୀବ୍ରତା ହ୍ରାସ ପାଇବା ସହିତ ପରିସ୍ଥିତିରେ ଉନ୍ନତି ଆସିବ।"

ସହରରେ ଲଗାତାର ଭାବରେ କମ୍ପନ ଅନୁଭୂତ ହେଉଥିବାରୁ, ସୋସିଆଲ ମିଡିଆ ଏକ ସମ୍ଭାବ୍ୟ ବଡ଼ ଭୂମିକମ୍ପ ନେଇ ଚର୍ଚ୍ଚା ହୋଇଥିଲା। ଜଣେ ପାକିସ୍ତାନୀ ଭୂତତ୍ତ୍ୱବିତ୍ ତଥା ଭୂମିକମ୍ପ ଏବଂ ଗବେଷଣା କେନ୍ଦ୍ରର ସିଇଓ ଶାହବାଜ ଲାଘାରି ଭୂମିକମ୍ପ ହେବା ପୂର୍ବରୁ ଭବିଷ୍ୟବାଣୀ କରିଥିଲେ। ଶୁକ୍ରବାର ଏବଂ ଶନିବାର ରାତିରେ ଏକ ବଡ଼ ଭୂମିକମ୍ପ ହେବାକୁ ଯାଉଛି ବୋଲି କହିଥିଲେ।

ସେ କହିଛନ୍ତି ଯେ ଶୁକ୍ରବାର ଏବଂ ଶନିବାର ରାତି କରାଚୀବାସୀଙ୍କ ପାଇଁ ବିଶେଷ ଗୁରୁତ୍ୱପୂର୍ଣ୍ଣ। ସିନ୍ଧ ସରକାର ଲୋକଙ୍କୁ ପୂର୍ବରୁ ସତର୍କ କରିବା ଉଚିତ। ଆମର ଗବେଷଣା ଦର୍ଶାଉଛି ଯେ ଛୋଟ ଛୋଟ ଭୂମିକମ୍ପ ପ୍ରାୟତଃ ଏକ ବଡ଼ ଭୂମିକମ୍ପ ହେବାକୁ ଯାଉଛି ବୋଲି ସୂଚାଇଥାଏ।

ସିନ୍ଧ ପ୍ରଦେଶର ମୁଖ୍ୟମନ୍ତ୍ରୀ ମୁରାଦ ଅଲି ଶାହ କହିଛନ୍ତି ଯେ ସେ ଭୂ-ଇଞ୍ଜିନିୟରିଂ ଅଧ୍ୟୟନ କରିଛନ୍ତି। ଛୋଟ ଭୂମିକମ୍ପ ବଡ଼ ଭୂମିକମ୍ପରୁ ରକ୍ଷା କରେ। ଭୂମିରୁ ଅଳ୍ପ ଅଳ୍ପ କରି ଶକ୍ତି ମୁକ୍ତ କରିବା ଏକାଥରକେ ଶକ୍ତି ମୁକ୍ତ କରିବା ଅପେକ୍ଷା ଭଲ। ତଥାପି, ସେ କହିଛନ୍ତି ଯେ ଏହାର ଗୋଟିଏ ଅର୍ଥ ହେଉଛି ଯେ ଏକ ଶକ୍ତିଶାଳୀ ଭୂମିକମ୍ପ ପୂର୍ବରୁ ଏପରି ଛୋଟ ଛୋଟ ଭୂମିକମ୍ପ ହୁଏ। ମୁଖ୍ୟମନ୍ତ୍ରୀଙ୍କ ବକ୍ତବ୍ୟ ପରେ କରାଚୀର ନାଗରିକମାନେ ଭୟଭୀତ। ସେମାନେ ଶୁକ୍ରବାରକୁ ଭୟ କରୁଛନ୍ତି।

କରାଚୀର ମୁଖ୍ୟ ପାଣିପାଗ ବିଜ୍ଞାନୀ ଆମିର ହାଇଦର ଲାଘାରୀ କହିଛନ୍ତି ଯେ କରାଚୀର ଐତିହାସିକ ଫଲ୍ଟ ଲାଇନ ସକ୍ରିୟ ହୋଇଯାଇଛି। ସେଥିପାଇଁ ସହରରେ ବାରମ୍ବାର ଭୂମିକମ୍ପ ହେଉଛି। ସେ କହିଛନ୍ତି ଯେ ଫଲ୍ଟ ଏହାର ଭୂକମ୍ପ ଶକ୍ତି ମୁକ୍ତ କରୁଛି। ଏହା ସହିତ କହିଛନ୍ତି ଯେ ଛୋଟ ଛୋଟ ଭୂମିକମ୍ପ ଗୋଟିଏ ସପ୍ତାହ ମଧ୍ୟରେ ଶେଷ ହୋଇଯିବ। 

କରାଚୀ ବିଶ୍ୱବିଦ୍ୟାଳୟର ଭୂତତ୍ତ୍ୱ ବିଭାଗର ଡକ୍ଟର ଇମ୍ରାନ ଅହମଦ ଖାନ କହିଛନ୍ତି ଯେ ଭାରତୀୟ, ୟୁରେସିଆନ୍ ଏବଂ ଆରବୀୟ ପ୍ଲେଟ୍ ମଧ୍ୟରେ ଅସନ୍ତୁଳନ ସହରରେ ଭୂମିକମ୍ପର କାରଣ ହୋଇପାରେ। କରାଚିରେ ଏକ ବଡ଼ ଭୂମିକମ୍ପ ହେବାର ସମ୍ଭାବନା ନାହିଁ, କାରଣ ସହରଟି ସକ୍ରିୟ ପ୍ଲେଟ୍ ସୀମାଠାରୁ ବହୁତ ଦୂରରେ ଅବସ୍ଥିତ। ତଥାପି, ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ବେକ୍ଷଣ (USGS) ଏବଂ ଭାରତର ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ରବିବାର ପରଠାରୁ କରାଚି ଏବଂ ଏହାର ଆଖପାଖରେ ଗୋଟିଏ ବି ଭୂମିକମ୍ପ ରେକର୍ଡ କରିନାହାଁନ୍ତି।